Hansruedi Knöpfli     Winterthur 
                                                                                                                                                                                                                                                                                                       Für und von Winterthur
 

Politik für alli

Uf dere Siite erfahred Sie viel über mini politischi Iistellig, well ich gern poäntiert rede und debattiere tue:

"Mitte-Politik isch d'Zemmesetzig vo rechtem und linkem Strömigs-bewusstsii, ohni dass die scheissrassistische Tön ghört werdet. Dadefür git's genauso wenig Platz, wie für die charrevertüfelnde Oekofundis vo de lingge Siite. Mobilität (au de Individualverchehr) ghört zu Eus und zu Eusem Stadtbild. Und ich verstand jedi/e, wo gern mit em Charre umefahrt.
Mitte-Politik heisst aber nid, das mer nid au mal agressiv cha aagriffe, wenn's de Sach dient. Und wenn's drum gaht, mit emene guete Konsens de Nonsens z'besiege."







DANKE!

Danke Eu Helfer|innen, Freund|innen, Polit-Expert|innen us Winterthur, wo Euch Stunde für Stunde engagiered, damit mir au wiiterhin e gueti und vernünftigi Mitte-Politik mache chönd. Mir büüted Lösige a, damit's mit Winterthur im Kanton Züri wiiter #vorwärts gaht.
Ihr helfed bim Biberli verteile, Postkarte verschicke, Mailings mache, Flyer verteile... Ihr sind alles tolli Type (früehner hett i gseit "geili Sieche", aber als Kantonsrat sött mer das ja wohl nid). 


DANKE!


Thema

 Miis statement

 Löösig

Bildig

Ich find's e Katastrophe, dass de Kanton Zürich de ZHAW im Jahr 2019 386 Mio. CHF zahlt. Mit Eusem Stüürgeld. Es isch e übertüüred und dient de Fachchräfteförderig überhaupt nid. Was nützed Eus 23jöhrigi mit emene Bachelor-Titel, wenn mir junge Undernehmer bruched, wo au in Zuekunft chönd Arbetsplätz schaffe und Stüüre zahle?
Es brucht au nid nume Mensche wo vo digitalem Lebe träumed, sondern es brucht Entreprenör.

Fachchräfte-Förderig muess nid dur Zuwanderig stattfinde, sondern dur Unterstützig vo de Bruefsbildig. So zum Biispiel alli Fachuuswis und Diplom wo im Kanton Züri prüeft werdet, müend endlich mal Understützig becho.

Verchehr

Rosegarte-Tunnel in Züri für 1'100 Mio. CHF. für 600 Meter Tunnel. Das isch en absolute Irrsinn, egal öb's zwei Tramlinie on top git oder nid. Vor allem isch die Variante nid fertig denkt, denn de Tunnel chunnt am Wipkinger-Platz use und führt de ganz Verchehr direkt uf de Escher-Wyss-Platz. Und umgekehrt wird's au nid besser.
Dezue ane chunnt, dass es Tram ja au nid grad s'liisligscht Verchehrsmittel isch - au de Lärm wird im Quartier bliibe.

E besserig Lösig für das Nadelöhr im Tangentialverchehr vo Züri. D.h. de Tunnel muess nid im Buechegg-Platz aafange, sondern scho in Schwammedinge und erscht im Chreis 5 - also under de Limmat dure - wieder füre cho. Das wär e echti Entlastig. Alles anderi isch reini Pflästerlipolitik.

Altersproblem

Älteri Mensche sind s'Fundament vo Eusem hütige Wohlstand. Sie werdet aber schigganiert (z.B. bi de Bestüürig, wenn's ghürate sind), aber au i de Arbetswelt.

Kei Stüürdifferenz zwüsche trennt oder verhüratet lebende Paar - egal, welli Uusprägig. Es cha doch nid si, dass mer meh Stüre muess zahle, wenn mer zäme isch?

Wer pensioniert isch, söll de ÖV gratis chönne benutze. Das würd d'Strasse entlaschte und em Tourismus diene, well mer nämli denn meh Uusflügler hetti und au de sozial Kontakt chönnti fördere.